كلمات الجنيه
الجنيه
بنصحي بدري ع الجنيه
نقول هيعمل فينا ايه
هو باشا وسط عرشه
و كلنا باصين عليه
ذل ياما وياما ذل
ياما عللي و ياما قل
و ياما خلي ناس تضل
و ياما ناس ماتت عليه
اللي شغال شغلتين
و المطبق باليومين
عشان يسد اي دين
و الجنيه بيضحك عليه
اللي يصحي بدري بدري
و برضه فقري ابن فقري
لما ليل و نهار بيجري
و ميلاقيش حاجه ف ايديه
بالجنيه الناس نوعين
ناس ملاعنه و كدابين
و ناس وراها تقول امين
و مبسوطين معرفش ليه
الجنيه عامل ميزان
للي طيب و اللي خان
و كله عارف من زمان
عارف اخرتها ايه
الجنيه من اسمه جن
نازل فوق دماغنا زن
نقوله اهدي نقوله حن
و محدش قادر عليه
الجنيه واخدنا وش
عامل جوه دماغنا وش
رغم انه و ياما كش
و لسه عامل فيها بيه
الجنيه دايما خاضضنا
بيتاعبنا و بيعارضنا
ذلنا و دايما رافضنا
و الغرور راكبه و ماليه
كله شايل الف هم
كله كح تراب و دم
ماشيه غم ماشيه خم
و شغل ٣ ورقات يا بيه
م الجنيه الكل تاه
كله ماشي و مش معاه
اه يا دنيا و الف اه
احنا بس عملنا ايه
الجنيه حير عقولنا
زاد و زود ف حمولنا
ياما هز و رج طولنا
و شبعنا ضرب بايديه
الجنيه دايما تاعبنا
شكله حاوي و بيلاعبنا
هو عيبه و لا عيبنا
ولا هى حكايته ايه
الجنيه ماكنش بايظ
كان هديه من العجايز
كان بيطلع ف الجوايز
ف كل حته بتلاقيه
كلمات اغنية الجنيه محمد فتحى