رساله كلمات
رساله اجت من مجهول
بس ما بيها اي كلمه
يمكن خاف بيها يگول
اي شي وينعرف اسمه
احسها خارج المألوف
اشگد بيها حچي محذوف
مرات العيون اتحس
ومرات الگلوب اشوف
كلما اريد اقراها
الحروف اشلون الگاها
الرساله البيضه معناها
اكبر من حچي الحروف
لا توقيع لا تاريخ
اشلون اعرف الكاتبها
ومن شميتها حسيت
اعرف عطر صاحبها
يمكن من كثر الدموع
حروف الورقه ممسوحه
لو واحد كتبها بالليل
ويصبر بالدمع روحه
احساسه يبين المجروح
رغم كل الحچي ممسوح
اليحچي بالدمع انسان
واصل مرحلة مذبوح
احس الدمعه اعرفها
گبل بعيون شايفها
من اسنين عافتني
بس اذكر سوالفها
مو كلشي انكسر مرات
نگدر نرجع انصلحه
اليحچي بالدمع ندمان
يعرف بالحچي يفضحه