كلمات اغنية معشوقتي مشاري بن نافل
معشوقتي جري القصايد مواويـل
ليـن الهـواوي يستلـذ بغرامـه
مع الفجر والعصر وان خيّم الليل
ونوحي ليا من غبت نوح الحمامه
ايه افخري بي ماعشقتي لك خبيل
ويفداك رجل ماتشيلـه عظامـه
وليا نشدك منقّـل القـال والقيـل
منهو عشيرك عرّفينـا مقامـه
قولي عشيري بينكم كنـه سهيـل
بين النجوم بطلعتـه واعتصامـه
وانته وربعك مع عشيري قناديـل
ياللـي غنايمكـم بنقـل النمامـه
وان ضايقك يام الرموش المظاليل
لا تدفني راسـك سـواة النعامـه
تنومسي بي لعنبو بـارد الحيـل
مايلحقـك بالمـدح فيّـه ملامـه
قولي عشيري آية العصر والجيل
قرم ينومس من يحـب القرامـه
من متعبين الخيل ذباحـة الحيـل
لطامة العايـل فحـول الزعامـه
فقيـر لكـن نـادر بالمشاكيـل
واختار درب غير درب السلامه
فيّ اعتزي وانا صعوط المهابيـل
ويبشر بيوم مثل يـوم القيامـه
نذر عليّ والنـذر مافيـه تبديـل
ياجارحك مايهتنـي فـي منامـه
قلته وانـا قـد الليـال المقابيـل
من داس لك جرّه ترانـي كعامـه
وان كان ماني من خيار الرجاجيل
عطينيا لبرقع ودوك العمامـه
وان كان ماني من خيار الرجاجيل
عطينيا لبرقع ودوك العمامـه
