كلمات قصيدة المسرحية عمرو حسن

كلمات قصيدة المسرحية عمرو حسن
Home - كلمات قصيدة المسرحية عمرو حسن

كلمات قصيدة المسرحية عمرو حسن

المسرحية
اوصفلكم بالظبط مشهد الافتتاح
اضاءة زرقا ف اخر الصالة
وشاب واقف برة بؤرة نور على خشبة المسرح
سلويت بدا المسرحية بغنوة الاطلال
ووراه كورال بيرددوا الغنوة
ف الزاوية كرسي ضهره للجمهور
وبنت حادفة شعرها ف النور ووشها لعنية
ف الواجهة فرد صوليست وبيانو
نازلة اضاءة صفرا من حواليه
وبلفة كاملة خدها على رجليه
بقا وشه ليها وضهرها بقا ليه وكانها رقصة
لفت قصاده ولما بصتله
كورد البيانو شد اوتارهم

بقا ضلهم بالطول عايم على الجمهور
وكل ثانية كان بيهدى النور
وكل لحظة كان بيعلى السور بين المؤلف
وبين اللي اتكتب ف الدور
وكان صوت بيقول بدون مايقول
العرض ساقع والاغاني معاك
والبطلة ساكتة والبطل جواك
الضل مر لاخر الصالة
لحظات بطيئة
ثم كله بلاك

انا انسان بسيط جدا
باكتب قصايد شعر لصحابي
واحيانا باعمل بطاطس او برص كاسات
موهوب اوي ف حاجات الكل شايف انها تافهة
زي اني اشطر حد يسمع ناس
مابقولش حاجة بس بسمعهم
وده شيء عظيم جدا
مش شرط تتكلم
كونك بتسمع بس ده شيء عظيم جدا
وشيء عظيم برضه
انك تودع ناس من غير ماتنساهم
ده اللي انتي مش فاهماه
شايفاني كلاسيكي
بتجرني العاطفة
لا اشبه العاصفة
اشبه لسينما الستينات
سينما الغنا والافيهات
لكن لعلمك
اصعب دراما دراما عاشها كوميديانات
وانا مش باحب الجاز
ولا عمري حوشت مبلغ للزمان الجي
كفايه ان انا حي
وعندي فرصه جديدة اقتل ناس
او اربي كلب واقوله اشعاري
او اخش سينما كل يوم جمعة
فاكره زمان
قولتيلي نفسك ف ايه وانا قولتلك تفضلي
كان قصدي مش تفضلي كان قصدي ماتسيبينيش
اديكي سيبتيني ولا زلتي باقيالي
كان يعني لازم اقولك كلمة على بالي من غير ما افكر فيها م الجهتين
شوفي كنا فين وبقينا فين
علي اي حال
بلاش دراما
دخل الممثل من اطار ثابت على خشبة المسرح
خد خطوتين قدام
وبدا يعبر بعينه بدون كلام
دم الاضاءة الموف غمر وشه
اصوات كورال بيزنوا ويوشوا
وعروقه نافره بشكل بقا واضح
ده المشهد الفاضح
غمت عنيه بايديها وامنلها
دلت ملامحه خلاص على انه بيحبها
والقاعه ضجت بالسكوت التام
غمض وكمل خطوة على قدام
وفتح عنيه مالقاش سوى الجمهور

بتبصوا ليه بشفقة
ومالكوا متعاطفين
انا مش حزين بالعكس
انا عادي
انتوا اللي مش فاهمين
انتوا اللي مكتئبين
تحبوا تشربوا ايه
باعمل لاتيه ممتاز
انا مدرسة واستاذ
بلاش موسيقي الجاز
فيها فراق محتوم
ممكن موسيقى يعني على ذوقي
ارجوكوا ماتبصوش بالحزن ده تاني
خلوها جواني وابتسموا علشاني
صوت الكورال بيرد ابتسموا علشانه
جمع الصوليست الحزن ف بيانو
ودموعه نزلت بلت الخشبة
بيقول صديقي عن الفراق
زي انسحاب المخدر من وريد حامي
بتقول حبيبته
ضلمة فجاة بعد نور عالي
يقول مدرب تنمية
قطع الامل بعد اتصاله
ويقول مدرس جامعي
طائر خرج م السرب وارتاح لانفصاله
بيقول روائي
هو تحويل الحكايه لفصلها التاني
ويقول موسيقي
هذا النشاذ اللي فاجىء بعض الحاني
باسمعلهم
وباقولهم اسمه الفراق
يكفيه بان اسمه الفراق
ما اجمل الاشياء ان لم تزد عن كونها اشياء
هذا انا
طايش ومتورط ف نفسي من زمن
صاحب الكافيهات وشريك ف قصر النيل
الوغد ف السينمات والطفل ف التفاصيل
ومهندس الفوضى
امي يتحكي عن طفولتي
كان طفل صعب
حساس ومتشائم لكنه مبدع
حول ف مرة كتاب قديم لصديق جديد
وف وشه كبرت رحلة العيله اللي جايه م الجنوب للبحر
لما اتاه الشعر في السن العجين
رعشة جناحه طيرت نصه الرزين
من وقتها وهو ناوي يحبها من قبل هذا الوقت بسنين السنين
انا مش بحب كتابة الماساه
فيه ناس حياتهم بائسة اكتر
والامر مش بالوزن
اتمنى يتحول جنون الحزن لعصير استوائي
اتمنى لما اصحى الاقي اسره من نفس اللي انا قررتهم
ياريتنا لما نقول ننول
اتمنى امي تحج
واتمنى عمال المرافق يهدموا الابراج ويرجعولي الذكريات بدورين
اتمني اقول الشعر لو مرة ف باريس
وبعدها تعزمني صحفيه جميلة ع العشا والدردشة ف شوارع النور الطويله
قد تنمو ف عنيا الفتاة المستحيله
وافتكر
سنتين قضتهم ف الغنا من غير موسيقى ملهمة
كم كنت صافيه ومجرمة
شد الممثل خيط عريض ولفه على رقبة زميلته بنص عنف وقالها
ليه الحاجات كارهانا واحنا نحبها
فتحت عينيها بوسعها
وكانها بتشوف حواف الموت على المسرح بجد
اتوتر الجمهور وحس الامر جد
وقبل ما يحاول يفكر اي حد يهد عرض بقاله سنتين ف بروفات
قطع الممثل مشهده
واتفك خيطه بخفه واتحول فراش
كم كنت اضعف لما حبيتك كده
وكاني غيري لما كنتي تقربي
مابقتش عارف
جايه ولا بتهربي
مابقتش قادر اقول فراقنا ده ذنب مين
كل اللي ع الخشبة هنا كانوا جد ولا ممثلين
ودراما قصة حبنا ليه اصبحت بعد السنين
قصة خرافه وتجربة عصفت بنا
كان اولى لو هنحب بعض نحبنا
بس احنا بنحب بغباء
صولو البيانو مر بيننا بكبرياء وفشلنا حتي نعتذر عن ذنبنا
كان اولى لو هنحب بعض نحبنا
بصي كدة
هذا الحوار لم يعجب الجمهور
مستنيين اخرج بطفل من الكالوس واقول
ده ابني بعد عشر سنين
او تيجي مثلا تحضري عرضي اللي جاي
ومعاكي واحد حسسك انك بشر

انا مش مهم
انا محض شاعر دوره يكتب للبشر
عربيد وطايح ف البارات
ومريض بداء عدم انتهاء التجربة
انا لا احد
مخرج وفصل كلمته عن نص عمره ما اخرجه
اتنين هنا بيهرجوا
ويجربوا يتفرجوا علي عرض شايل حلمهم
او كدبهم على بعضهم
او حتى خوفهم م الحياة
اتنين غلابة زينا
مسامير ف حضن لبالونات متلونة
كان اولى لو هنسيب نسيب من غير رجوع
كان اولى لو هنحب بعض نحبنا

كلمات قصيدة المسرحية عمرو حسن

كلمات قصيدة انتي نقطة ضعف عمرو حسن

معلومات عن اغنية المسرحية

المسرحية

كلمات الاغنية :

تصنيف الاغنية :

فيديو اغنية المسرحية