كلمات اغنية حلة محشي احمد مكي
خد يا واد حلة المحشي دي ووصلها لخالتك
نهين فيهم ميار
خالتك ميرفت يا واد مش ميار
ميرفت آه
نزلت الصبح أوصل حلة محشى لخالتى
ورق عنب فلفل رومي وكرومب ويوستفندى
أول ما نزلت الشارع فوقت وفوقت من الزحمة
بين كل واحد وواحد واحد يارب الرحمه
يا ترى الزحمة دي ليه، فيه وزع لحمة
بصيت في ساعتي لقيتها إتنين يا منجى من الكوارث
ساعة مرواح موظفين خروج كل المدارس
زحمة ومفيش رحمة وكله عالكلاكس دايس
أصوات معجونة في بعض وأعلاها صفارة السايس
هات ورا يا كابتن
لازم ألاقي تخريمة طريق قصير مختصر
أصلي متعسف تعسيفة نفسي أوصل وفي لمح البصر
أول طريق الطلبية وحلمى للمنيل أصل
قبل ما المحشى يبوظ فى الحلة ويومى كله يروح هدر
قطع حبل أفكاري تكتك عرض تعريضة خطر
جيت أركب فيه قالى، إستنى دا أنا جاى أتغدا، أضرب حجر
قلبي انفطر دا أنا عندى أموت أحسن من أفضل منتظر
وصلنى وكل ربع الحلة وريتهاله قام منبهر
ركبنى وضرب الربع وخد أجره وطرشي وفلفل جزر
طول الطريق ياكل غرزة فى صباع محشي في غرزة انكسر
يجي مية مراية عربية ويشتم بدل ما يعتذر
هار أسود، مرئة المحشى فى حجري، نزلنى ياسطى
يا برنس ما كنتش بجري، الله
بيتك لبيت برودك
حلة محشي، حلة محشي لخالتى
خالتك ميرفت، ميرفت مش ميار
مش عاجبك أنزل أركب تاكس
طالما برنس أوي فى نفسك
زباين آخر زمن
ونزلت ع الناصية نطيت في ميكروباص للجيزة
مكتوب عليه برنس الليالي ومزيكته لذيذة
سواقه سيس وحاطط في خرم ودنه بريزه
ومطول ضفره الأخراني قذارة بالغريزة
ركبت جنبه قالي، “إيه اللي في حجرك دا يا كابتن”
قولتله محشي قالي، “تجيب صوباع ولا هتنتن؟”
رفع نظارة الشمس وعينه حمرا وشكله مبرشم
دب إيديه فى الحلة وهو بيغنى ويدندن
بيقلب في الحلة في المحشي ويفعص فيه ويشمشم
قالي، “مش واكل دا مجلد، ساقع لازم يتسخن”
هات يا بني والدي يوستفندي، إيديته قام متفنن
ياكل ويتطرطش غرقنى بقيت قاعد متعكنن
مهما يتف البذر بعيد يخبط فيا كأنه منشن
ووصلنا الموقف جت أنزل قالي، “خد، خد هتصهين”
“هات الأجرة يا إما هفتح مطوة عليك وأتجنن”
أنت قد الكلام ده يا اسطى؟
آه، قده قده قده
ولا تعرف تعمل معايا حاجة
شفايفي أتشققت مالوقفة في الشمس بستنى
أوتوبيس المنيل هو حلمي وطموحي وما أتمنى
أول ما شوفته فرحت فرحة واحد داخل جنة
قرب شوية اكتشفت أنه استحالة اتهنى
من الزحمة الناس باظة من الباب بظة علبة سردين
ارحمنا برحمتك يا مثبت العقل والدين
نطيت جواه من كتر الزق لزقت فى ظهر ولية
ضخمة وتخينة لفت بصت بصة مفتريه
وبعلو صوتها، “احلقونى شاب اتحرش بيا”
Oh my god
كل الناس مسكت في خناقي تقولش وقعت في أعدائي
لو كنت في قسم كانوا أدوني فرصة أدلي بأقوالي
وفي وسط الظيطة ببص لقيت الكمسري قام ضرب الباقي
هربان بالباقي مية جنيه اديتهاله أتشلت أعضائي
أتحول شاب أتشقلب نط من باب الأوتوبيس بالباقي
فجأة ما لقيتش الحلة صرخت وقولت، “أين أشيائي”
فلمحت واحد نازل فيها حش وبيعزم ع الباقي
كرهت من قلبي البشر دا فعلا كائن غوغائي
ياريتني كنت أي كائن تاني بري أو مائي
فجأة اتشنجت وهنجت التهجنيج الضارب كيميائي
ضارب كيميائي
نازل أوصل حلة محشي لخالتى
خالتك ميرفت، ميرفت مش ميار
حد يا بني ينزل ساعة الضهرية
يا ريتني موصل جمبري استاكوزا أو كافيار
قلعت ملط واقف بلبوص جنب الرصيف
بنظم المرور تحت أشعة شمس الصيف
بعوى وأكاكي وساعات بجري وأنونو
وأنقر الناس في الشارع زي طير السنونو
زي السنونو زي السنونو آه، يا سنونو
كلمات حلة محشي احمد مكي
كلمات اغنية منطقتي احمد مكي
