ضحكات خلي كلمات
وش تبين من المطر والغيم يا ضحكات خلي
من يشوفك شاف نوض البرق في عرض المخيلة
زابن الصوت الرقيق وزابن الوجه المهلّي
لا تسيّل واديٍ مانيب متحرّي مسيلة
امسك ايدي لين اجي كلي معك واروح كلي
واعتبرني تايهٍ في الدرب خلاك الدلية
انت لك رمش ليا منه ذبح عوّد يصلّي
والا انا مالي على شيٍ عطاك الله حيلة
شايفٍ في عيونك الثنتين ترحالي وحلّي
وصامتٍ صمت الصبور اللي على جمر المليلة
تشرق الشمس وتغيب الشمس وانا في محلّي
اتصبّر واعرف الغاية ولا اعرف الوسيلة
من عذلني منك قلت الموت عنده جايزلي
وان بغى قتلي طعنت الروح لين أشفي غليله
فدوة الطرف الكحيل وفدوة الغمازة اللي
ضاميه من مبسمك ولا روت من سلسبيله
عن قبال يسرق الالباب مانيب امتخلّي
ناسل روحي على متنك مثل نسل الجديلة
ان ضحكت تعلّم الازهار وشلون التجلّي
وان بكيت تساوي النفس العزيزة بالذليلة
من عرفك وما قضى عمره طروب ومسفهلّي
من لقاك وما لقى الدنيا مثل وجهك جميلة
منت بالظبي الجفول ومنت بالظبي المفلّي
الظبا ما تسجن العاشق ولا تخلي سبيله
لا تعلمني على فرق الغرور من التغلّي
العيوب اللي على غيرك عليك من الفضيلة