كلمات اغنية قطر الحياة احمد مكي
في كل لفة عقرب ساعة عمري بيتسرسب بيعدي
الناس والدنيا بتتغير حتى الحديد بيصدي
وأنا الوحيد واقف مكاني ثابت
في ناس اختارت سكة صابت ناس تانية اختارت سكة خابت
إحساس قاسي وصعب لما الناس تشوفك فاشل
أبوك وأمك وأخواتك وصحابك شايفينك عاطل
قوم يا ابني اسعى وحاول والله غلبت أحاول
ياما حاولت وقبل الجون ما يجي يطلع فاول
ماعنديش مهارة وحتى كوسة
وحوستي حوسه
ودوست بعد آخر البنزين بدوسه
في كل مقابلة شغلانه يتقالي لف نفسك بشهادتك مدد بجنب أي حيط وخدلك بوسة
رجعت فلاش باك حسبت سنين عمري ٣٠ سنة لقيت
حسبت تاني وتالت واتخضيت
ببص في المرايه كام شعرايه بيضة لقيت
وأبويا هو اللي لسه بيصرف ع البيت
بتعامل من عيلتي على اني عالة وحالتي حالة
ثقتي بنفسي راحت النجاح بقى استحالة
نفسي اهرب من نفسي ومن حالتي ومن عيلتي ومن الدنيا
نفسي ألقى دنيا تانية اهرب ليها لو حتى ثانية
وفي يوم قالهالي صاحبي واللي يدلك ع الطريق
مايفدش صاحب غير صاحبه اسمع من الصديق
قالي في قعدة ضرب حلوة بالليل عاملينها
سألته هاش ضحك قالي بيسه قولتله لادمنها
قالي ماتخافش مش ممكن تدمن من أول شكه
أقنعني . بالليل فعلا شكيتلي أول شكه
مفاصلي ساحت وارتاحت وروحي راحت
بكلم نفسي من جوه وبرغي من بره ساكت
همومي شبه تاهت والرؤية باهت في باهت
كل مشكلة كانت عندي في الدنيا ماتت وتاهت
عدت ساعات في ثانية لقيت الصحبة قايمه
دخلت بيتي وش الفجر عيلتي كانت نايمة
دفنت نفسي تحت البطانية جسمي متلج
نمت في أقل من ثانية نومة واحد متبنج
قطر الحياة بيعدي بسرعة سنة فـ سنة فـ سنة
وانا زي ما انا من لما كان عندي سنة
هي هي الحياة هو هو أنا أنا زهقت طهقت من الحياة تقدر تقول مليت أنا
صحيت وفقت رجعت تاني للواقع والعكننه
عدى النهار بطيء كأنه كام شهر وسنة
نفسي النهار يعدي بسرعة واضرب تاني
أرجع ملك زماني بعيد عن العالم اللي رماني
خلوني أضرب معاهم كل يوم وبتعزم
خلاص دخلت السكة والطريق بيترسم
فاجئني صاحبي في يوم قالهالي في وشي خف تعوم
أجيب فلوس منين ليا وليك نضرب كل يوم
شخشخ جيبك يا من قعدتنا دي تكون محروم
من النهارده مفيش ضرب ببلاش مفهوم
مفهوم
روحت وتاني يوم في معاد الضرب جسمي اتكهرب
كرابيج في ظهري ومناخيري سايله وبتسرب
عاوز اضرب
منين أجيب فلوس منين أجيب فلوس
بدأت أستلف من كل اللي اعرفه وأدوس
وحتى أخواتي خدت منهم ياما فلوس دروس
كله كرهني وبيهرب مني تقلت ع النفوس
خمسين جنية في خمسين في مية في مية
بسرق يوماتي فلوس من البيت وكله شك فيا
نزلت بعت كل حاجة جاتلي في يوم هدية
خلصت فلوسي لحد في يوم ما جتلي فكرة هي هي
دهب أمي موبايل اختي لاب توب اخويا
سرقتهم نزلت اهرب من البيت وقفني أبويا
حاول يمنعني مسكني من ايدي جامد زقيته
اتخبط في الحيط وبصلي ازاي ابنه وأذيته
خد مني كل حاجة وتربس الباب غضب
ساعتها طلبت أغرب حاجة ممكن تتطلب
عاوز فلوس حالا يا إما هرتكب جريمة
أتهمني بالجنون وأداني كام شتيمه
بيبان كل الأوض بتتفتح عيلتي بتتفرج
لسه بيستوعبوا يمكن ده جد يمكن بنهرج
سحبت بنت اختي ٣ سنين ناحية شباك
هاتوا الفلوس لارميها فجأة زاد الإرتباك
أمي بكت بحرقة قدامي فوقت لثواني رميتلي فلوس وبصوت عالي ماشوفش وشك تاني
امشي مالكش أم يا أبغض من شيطاني
خدت الفلوس وجريت عارف مش راجع بيتي تاني
قطر الحياة بيعدي بسرعة سنة فـ سنة فـ سنة
وانا زي ما انا من لما كان عندي سنة
هي هي الحياة هو هو أنا أنا زهقت طهقت من الحياة تقدر تقول مليت أنا
خسرت كل أهلي وصحابي بقيت وحيد
ومنين هجيب فلوس لازم ألقى طريق جديد
فجأة افتكرت جار من سني ساكن لوحده طول عمره
أبوه في إعارة بره مصر وشهري فلوس يبعتله
شديته زي ما اتشديت أنا لنفس الطريق
لقيت مصدر فلوس جديد وبيت ولقيت صديق
نضرب سوى بفلوسه وفي بيته مالناش ظهور
شقى سنين أبوه خلص كله في ٤ شهور
وفي ليلة بنضرب جتله مكالمة ماصدقهاش
أبوه عرف إن ابنه بيسرقه اتنقل إنعاش
كل عصب في جسمي اتوتر زودت الجرعة أكتر
الجرعة المعتادة خلاص مابقتش تأثر
شريط حياتي بيتعرض قدامي أخبر في أخبر
ضربت السم في عروقي زودته أكتر وأكتر
نفسي أفنى وأخلص من الدنيا زي المايه اتبخر
كمان زودت سنه جسمي كله اتلون أصفر
صاحبي اتفزع قام واتسرع مالك أصفر ليه يا جدع
جسمك عرقان وبتترعش زي اللي من الحية اتلدع
رغم إني غرقان في العرق جسمي متلج موجوع وجع
من خضتي جيت اصلب طولي جسمي ع الأرض اترزع
جسمي رافض لكل أمر مني القوة اتهدت والدنيا بتضلم تديرجي واحدة واحدة اسودت
آخر لقطة في حياتي شوفتها كانت مأساة
صاحبي مرعوب وبيراقب فراقي للحياة
قطر الحياة بيعدي بسرعة سنة فـ سنة فـ سنة
وانا زي ما انا من لما كان عندي سنة
هي هي الحياة هو هو أنا أنا زهقت طهقت من الحياة تقدر تقول مليت أنا
عمري بسرعة انتهى
رجعت شريط حياتي مالقتش في حاجة عدله تتذكرلي عملتها
حياتي راحت مني كلها ضيعتها
ندمان على كل لحظة غامقة في يوم انا عشتها
يا رب أديني فرصة تاني أرجع للحياة
همشي في طريقي صح لحد آخر منتهاه
دي حاجة صعبة فعلا إنك تختفي من الدنيا
والناس ماتفتكركش بحاجة حلوة لوجه الله
كلمات قطر الحياة احمد مكي
كلمات اغنية فيس بوكي احمد مكي
